Greenland Oil Spill Response ukiumoortumik ataatsimeersuarpoq

Marlunngorneq, apriilip 12-iat, 2016

Assiliisoq: Lars Demant-Poort

Uuliasiorluni misissuinermut suliassaqarfiup iluani ingerlatat annikikkaluartut, ukioq 2015 Greenland Oil Spill Response-mut (GOSR) ulapaarfiuvoq.


Aprilip sisamaani 2016 Greenland Oil Spill Response ukiumoortumik ataatsimeersuarpoq, uuliasiornerup iluani nunani tamalaani annikilliartortitsisutut malunnaateqaraluarluni GOSR 2015-imi ulapissimapput.
Ukiumi ilanngaaseereerluni kaaviiaartitat 2014-imi DKK 3.957.641-iusimallutik DKK 4.645.801-iupput. Akileraaruteqareernermi angusat nalinginnaasut 2014-imi DKK‑228.587-iusut ukioq manna DKK-114.266-iupput. Aqutsisut ukiumi angusat, 2014-imi angusanut sanilliullugit, naammaginartutut isigaat.
Siulersuisut tamarmik qineqqinneqarput, siulersuisullu taamaammik suli ukuupput Steen Ove Hansen, Oddbjørg Varhaug Greiner aamma Hanne Berthels.

Uuliakoornermik akiuiniarnermut ilinniartitaaneq
2015-imi namminneq kajumissutsiminnik upalungaarsimasussanut ilinniartitsineq aallartippoq. Inuit 16-it juni 2016-imi juunip naanerani uuliakoornermik akiuiniarnermut ilinniartitaaneq malitassanik nunani tamalaani akuerisaasunik aallaaveqartoq GOSR-ip ingerlataa naammassisimassagaat naatsorsuutigineqarpoq. Uuliakoornermik akiuiniartartut 16-it taakkua innuttaasuupput inuinnaat, Nuummiittut aamma Aasianniittut; illoqarfiit marluk taakkua GOSR-ip atortuinit inissisimatitsivigineqartut.
Nammineq kajumissutsiminnik upalungaarsimasoqarnermi uuliamik mingutsitsinermik akiuiniarnermut atatillugu najukkami ilisimannittunik sukkasuumik sulilersitsisarnissaq GOSR-ip sullitaannut qulakkeerneqarsinnaalissaaq.

Atortunik  misileraaneq
Memorandum of Understanding (MoU) GOSR-ip aamma tuluit ingerlatseqatigiiffiata OSRL Ltd.-ip akornanni 2014-imi isumaqatigiissutigineqartoq pissusissamisoortumik malitseqartillugu, 2015-imi ukiaanerani ataatsimoorluni atortunik  misileraanissap annertunerusup kiisalu Kalaallit Nunaanni sungiusarnissap GOSR-ip aamma OSRL-ip akornanni pilersaarusiorneqarnera aallartinneqarpoq. Atortut OSRL-imit nassiunneqartut, GOSR-ip atortuisa misilerarneqarnerat, kiisalu Kalaallit Nunaanni ataatsimoorluni sungiusarneq, 2016-imi iluatsitsiviulluartorujussuarmik ingerlanneqarput.

GOSR nunani tamalaani suleqatigiinnerat
Nunani tamalaani suleqatigiinneq aamma ilisimasanik avitseqatigiittarneq GOSR-imut taassumalu ineriartorteqqinneqarneranut pingaaruteqartorujussuupput. Taamaattumik GOSR-ip 2015-imi upernaakkut ilisimatusarfiit 12-it allat peqatigalugit EU-p Horizon 2020 ingerlataa aqqutigalugu aningaasalersuinissaq pillugu qinnuteqaateqarneq aallartereerpaa. Suliniummi “Integrated oil spill response actions and environmental effects – GRACE” silap pissusaani nillertumiittumi uuliakoornermut upalungaarsimanerup iluani ineriartortitsineq, sunniuteqarluartumik ingerlatsinermik sanilliussisarneq naliliisarnerlu, kiisalu periaatsit assigiinngitsut avatangiisinut sunniuteqartarnerat, aallunneqarput. Suliniut 2016-ip aallartinnerani akuerineqarpoq aammalu 2016-ip aallartinneraniit 2018-ip aallartinneranut ingerlanneqassalluni. Missingersuutit ataatsimut katillugit annertussuseraat EUR 5,28 mio., taakkunannga GOSR-ip suliniummi peqataanera annertussuseqarluni EUR 230.000, taakkualu ilaatigut misileraanissamut atortunik pisinermut kiisalu Kalaallit Nunaanni angallammik attartornissamut atorneqassapput.

Ukiumoortumik nalunaarusiaq 2015-imut uani atuaruk: Ukiumoortumik nalunaarusiaq 2015

Paasisaqarnerorusuttut attavigisinnaavaat
Pisortaaneq Lonnie Bogø Wilms
+299 325 245       
Email: lbw
@gosr.gl