Greenland Oil Spill Response aamma Oil Spill Response ataatsimut sungiusarput

Tallimanngorneq, apriilip 15-iat, 2016

Ulluni 8.-21. marts 2016 Greenland Oil Spill Response-p (GOSR) tuluit ingerlatseqatigiiffiat Oil Spill Response Ltd. (OSRL) suleqatigalugu, nillertumi/issittumi pissutsit atuutsillugit atortut sulisullu misilerarnissaat siunertaralugu, taaneqartartoq ”silap pissusaani nillertumiittumi sungiusarneq” ingerlappaa

Martsip qaammataani Greenland Oil Spill Response-p Oil Spill Response Ltd. Suleqatigalugu Nuup eqqaani uuliakoornermik akiuiniarnermut atortut misilerarpai.
Sungiusarneq qaammatit 6-ingajanni pilersaarusiorneqarpoq, tassami sorpassuit inissinneqaqqaartussaammata, ilaatigut atortut suut misilerarneqassasut kissaatigineqarnersoq, angallatit najukkameersut suut sungiusarnermut naleqqunnersut aammalu sungiusarnermi kikkut peqataassanersut isumaqatigiissutigineqartussaallutik.  OSRL-ip  Southampton-imi suliffeqarfimminit uuliakoornermik akiuiniartartut misilittagaqartut 8-it Nuummut nassiuppai aammalu GOSR-imiit peqataapput Pisortaaneq Lonnie Wilms, Operations Manager Vilhelm Lynge Hard kiisalu uuliakoornermik akiuiniartartut; Benny, Kenneth, Morten aamma Heidi.

GOSR-ip uuliakoornermut akiuiniartartui nammineq kajumissutsiminnik sulisuupput aammalu suli ilinniartitaaneq ingerlallugu, kisiannili OSRL-ip uuliakoornermik akiuiniartartui inuussutissarsiutigalugu tamakkiisumik sulisuullutik uuliakoornermik akiuiniartartuupput, taamaattumillu suleqatigiinneq qanoq ingerlassanersoq, aammalu uuliakoornermik akiuiniartartuvut OSRL-imeersut peqatigalugit qanoq ingerlalluassanersut, takunissaat pissangangisorujussuusimavara” oqaluttuarpoq Pisortaaneq Lonnie Wilms.

Asseq: Lars Demant-Poort – Lonnie Wilms

Pikkorissaanerup immikkoortua siulleq aamma atortunik Tuluit Nunaannit nassarneqarsimasunik misileraaneq Nuup Kangerluani sermip eqqaani ingerlanneqarput. Tassani Roboom 1500 aamma Desmi Pyroboom misilerarneqarput.  Ro-boom 1500 tassaavoq sinerissap avataani assiaqutsersuut puttasoq, aammalu ilisimaneqarnerpaanut sunniuteqarluarnerpaanullu ilaalluni, tassani Pyroboom assiaqutsersuutaalluni puttasoq ikuallassinnaanngitsoq uuliamik ungalullugu unitsitsisinnaasoq, tamatumalu kingorna uulia ungalullugu unitsinneqartoq imaani ikuallanneqassalluni.

 

Uuliamik imaani ikuallaaneq, imaani uuliakoornermik akiuiniarnermut periaasiuvoq akuerisaasoq, taamaattoq oqartussaasunit akuersissummik peqarnissaq piumasaqaataavoq aammalu nammineerluni aallartinneqaannarsinnaanani. Taamaattoq tamanna uagutsinnut soqutiginartorujussuuvoq aammalu puttasunik assiaqutsersuineq taamaattoq misilerarsinnaagatsigu nuannaarutigisorujussuuara, tassami aamma uagut nunani tamalaani suliniummi peqataagatta, tassani imaani uuliamik ikuallaasarneq sammillutigu, aammalu atortunik taamaattunik pisinissaq nammineerluta isumaliutersuutigaarput” oqaluttuarpoq Pisortaq Lonnie Wilms.

Kangerlummut angalareernerup kingorna peqataasut Nuummut uterput, tassani sungiusarneq suli alla peqataaffigissallugu. Nuummi Atlantikukkoortaatinut talittarfimmit OSRL-ip aamma GOSR-ip avalatseqqippaa; Ro-boom 1500 puttasoq assiaqutsersuut, taamaattoq tassani umiarsualiviup talittarfianit, tassanilu angallatip assiaqutsersuut puttasoq imaanut kalillugu aammalu angallat alla assiaqutsersuutip puttasup sammiveqartumik ingerlatinnissaanut tapersersortitut atorneqarluni. Sungiusarneq taanna aamma iluatsilluarpoq aammalu angallammik assiaqutsersuummut puttasumut imusaasumut aammalu generatorimut tassunga atasumut inissiivissatut naleqquttumik nassaartoqarsinnaanngippat, assiaqutsersuut puttasoq qanoq inissinneqarsinnaanersoq paasinarsisitsilluarluni.

Assiliisoq: OSRL – Atlantikukkoortaatinut talittarfimmit Roboom 1500 avalatsinneqarnera  

GOSR aamma OSRL tamatuma kingorna taaneqartoq ” Arctic Shoreline Clean-Up Assessment” (Arctic SCAT) pikkorissaaneq ingerlanniarlugu Qoornumukarput. SCAT tassaavoq sinerissap killinganik nassuiaanissamut nalilersuinissamullu periaaseq assigiissaariviusoq. Assigiissaariviusumik nassuiaaneq taamaattoq, uuliamik mingutsitsisoqarsimanerata kingorna saliinissamut pitsaasumik iliuusissanut pilersaarummik suliaqarnissamut qulakkeereqataassaaq. OSRL SCAT-inik nalinginnaasunik suliaqarnermik sungiusimannippoq, kisianni Arctic SCAT ilisimasaqarfigivallaarnagu, taamaattumik GOSR-imi sulisut ilaatigut sikoqarneranut aputeqarneranullu tunngatillugu paasisimasaminnik immersueqataasinnaasimapput.

Asseq: OSRL – Qoornumi pikkorissarneq Arctic SCAT

SCAT-imik nalilersuinerup ingerlanneqareernerata aqaguani, Qoornup eqqaani GOSR-ip nammineq atortui avalatsillugit sungiusarneq naammassineqarpoq, ilanngullugit Desmi Beachboom (sissami assiaqutsersuutit puttasut) aamma Desmi Troilboom AFPU750 (sinerissami assiaqutsersuutit puttasut pullattakkat).

Kalaallit Nunaanni uuliakoornermik akiuiniartartunik, namminneq avatangiisiminnut ilisimannittunik taamaattumillu akiuiniarnermut periaatsit, periusissat killiliisussallu, uuliamik mingutsitsisoqarnerani pitsaanerusumik suliniuteqarnissamik qulakkeereqataasartut paasisimasaqarfigilerunikku, avatangiisiminni qanittumiittuni uuliakoornerup akiorniarnissaanut periaatsit suut pisariaqarnersut nalilersuisinnaanissamut tunngavissaqarluarnerusunik, ilinniartitsinissaq uagutsinnut pingaaruteqarpoq” nassuiaavoq Pisortaaneq Lonnie B Wilms.

Atortut aamma sulisut sungiusarnerup nalaani nillertumi atugaqartinneqarlutik “misilerarneqarput”. Ajornartorsiutit GOSR-ip aamma OSRLip pikkorissaanermi paasinarsisinneqartussatut kissaatigisaat tassaapput nillertumiilluni atisat sullisit aamma atortut. Pikkorissaanermi kissassutsit -1°C aamma -10°C akornanniipput, -17°C tikillugu nillertigilertarluni. Atortut tamarmik nilleraluaqisoq ajunngilluinnartumik atorsinnaapput; assiaqutsersuutit puttasut qanimaatsuupput aammalu sikukkut kalinneqarnerminni ajoquseratik aammalu atortut aallartittakkat ajornartorsiutitaqanngitsumik aallartarput. Atisanut sullisinut aamma silap pissusaani nillertumi sulilluni misileraanermut tunngatillugu, taakkua aamma ajunngitsumik ingerlapput. Atisat sullisit toqqarneqartut, GOSR-imut tunngatillugu tassaasut atallaat puttaqutit aamma annanniut aaqanngitsoq, sulinerup ingerlanerani akornusiinngillat aammalu oqorsaataalluarlutik. OSRL-ip atallaat annanniutit atorlugit sulinissaq toqqarpaa, taakkualu silami qanoq nillertiginera apeqqutaatinnagu oqortorujussuusut paasineqarluni. Taamaattumik atisat sullisit toqqarneqartut aamma atortut silap pissusaani nillertumi atugassat GOSR-ip naammagisimaartorujussuuai.

Asseq: OSRL – Qoornup eqqaani Troilboom AFPU750 aamma Beachboom avalatsinneqarneri

Tamaasa ataatsimut isigalugit sungiusarneq ingerlalluartorujussuuvoq, atortut siunertarisatsitut tamaasa misilerarpagut, neriuutigisatsitut kisiannili naatsorsuutigisatsituusariaqanngitsoq atorsinnaapput aammalu nammineq kajumissutsiminnik sulisut suleqatigiilluartorujussuupput aammalu pitsaasumik suliaqarluarlutik, taamaattumik tamanna tulluusimaarutigisorujussuuara. Sungiusarneq GOSR-mut OSRL-imullu nukittorsaataanikuuvoq, siunissami OSRL peqatigalugit sungiusaqqikkusuttorujussuuvunga, ” oqarpoq Pisortaaneq Lonnie B Wilms.

Takussutissiaq matumunnga “Silap pissusaani nillertumi sungiusarneq” marts 2016

  • 8.-12. marts: atortut, angallatit sulisullu piareersarneqanerat
  • 13. marts: atortut angallammut Sanna-mut usilersuunneqarnerat. Nuummiit Sanna-mut ilaalluni 11-inik peqataasoqarluni nal. 20 aallarneq. Qoornup eqqaani Sanna-mi unnuineq.
  • 14. marts: Nuummiit angallammik Madsalex-imik 3-inik peqataasoqarluni aamma 3-inik alapernaarsuisoqarluni aallarneq. Roboom 1500 Sanna-miit Madsalex tapersersortitut angallataatillugu kangerlummi sermip eqqaani avalatsinneqarnera. Katersuissutip Vikoma Komara 20 Sanna-miit kangerlummi sermip eqqaani ikkunneqarnera. Nuummut uterpoq aammalu Qoornup eqqaani Sannami unnuineq.
  • 15.marts: Nuummiit Madsalex-imik 3-inik peqataasoqarluni aamma 3-inik alapernaarsuisoqarluni aallarneq. Pyroboom Sanna-miit Madsalex tapersersortitut angallataatillugu Qoornup eqqaani avalatsinneqarnera. Angallatit tamarmik unnuk taanna Nuummut uterput.
  • 16. marts: Roboom 1500 Nuummi Atlantikukkoortaatinut umiarsualivimmit Madsalex-imit aamma angallammit Marie Martek-imit avalatsinneqarnera.
  • 17. marts: Nuummiit angallammik HJ Rink-imik 12-inik peqataasoqarluni aallarneq.  ”Arctic SCAT” Qoornumi
  • 18. marts: Qoornup eqqaani Beachboom aamma AFPU 750 assiaqutsersuutit puttasut ”Hiistit skuuatut avalatsinnerat” kiisalu imermut imaarsaatit atorlugit ”sissamik tissalutsitsineq. Ualilluarnerani Nuummut uterneq
  • 19.-20. marts: atortut misissorneqarnerat poortorneqarnerallu – sungiusarneq naammassivoq.

Pissusiviusut

Sooq sungiusarneq ingerlanneqarpa:

  • GOSR aamma OSRL Memorandum aamma Understandig 2014-imi ingerlatseqatigiiffiit akornanni atsioqatigiissutigineqartut naapertorlugit suleqatigiinneq nukittorsarniarlugu.
  • OSRL-ip aamma GOSR-ip sulisui ilinniartinneqassammata
  • Atortut sulisullu pissutsit nillertumi/issittumi atugarineqartartut atuutsillugit misilerarniarlugit

Alapernaarsuisut:

  • Alapernaarsuisoq 1 Aatsitassanut Ikummatissanullu Pisortaqarfimmeersoq
  • Alapernaarsuisoq 1 ITOPF-imeersoq (International Tanker Owners Pollution Federation)
  • Alapernaarsuisoq 1 Desmi-Ro-Clean-imeersoq

Greenland Oil Spill Response (GOSR):

GOSR ingerlatseqatigiiffiuvoq Namminersorlutik Oqartussanit pigineqartoq 2012-imi pilersinneqarpoq aammalu uuliasiornermut suliffissuaqarneq aqqutigalugu annertunerpaatigut aningaasalersorneqarluni. Ingerlatseqatigiiffik uuliamik mingutsitsinermut upalungaarsimanerup iluani suliaqarnermik ingerlatsivoq, pingaartumik aatsitassanut suliassaqarfiup iluani. Ingerlatseqatigiiffik Nuummi aamma Aasianni toqqorsiveqarpoq aammalu 2,5-inik sulisoqarluni kiisalu 16-inik nammineq kajumissutsiminnik sulisunik uuliakoornermut akiuiniartartoqarluni. Paasissutissanik annertunerusunik piniarnermi takuuk www.gosr.gl

Oil Spill Response Ltd. (OSRL):

OSRL nunarsuarmi uuliakoornissamut upalungaarsimanermut ingerlatseqatigiiffiit annersaraat aammalu tassaalluni uuliakoornissamut upalungaarsimanermut suliffeqarfik suliffissuarnit pigineqartoq, nunarsuaq tamakkerlugu uuliakoornissamut upalungaarsimanermik sukkasuumik suliaqartitsisarluni nunarsuarmi suliaqartuusoq. Ingerlatseqatigiiffik uuliasiorfiutileqatigiiffinnit 45-init tamakkiisumik pigineqarpoq taakkualu ilaasortai nunarsuarmi uuliamik tunisassiornerup 60 %-ianik suliaqartuupput. OSRL nunarsuarmi tamarmi sumiiffinni 11-ini agguataarsimasunik 300-it missaannik sulisoqarpoq. Uuliakoornissamut upalungaarsimanermut ingerlatseqatigiiffittut siuttuusutut OSRL ukiut qulikkaat pingasut kingulliit iluanni uuliakoornernik 400-init amerlanerusuni saliinermi peqataasimavoq, ilanngullugu 2010-imi Mexicanske Golf-imi Macondo-mi ajutoorneq aamma 2009-imi Australien-imi Montara-mi kuutsitsisoorneq. Paasissutissanik annertunerusunik piniarnermi inussiarnersumik takuuk www.oilspillresponse.com