Nittartakkami tusagassiorfimmi eqqunngitsumik tupaallannartumik qulequtsiineq

Sisamanngorneq, juulip 14-ta, 2016

§ 37 (nr.157) naapertorlugu apeqquteqaatip malitsigisaanik nittartakkami tusagassiorfiup sermitsiaq.ag¨-ip aviisimut ilanngutassiaq qulequtaqartoq ”Greenland Oil Spill Response balancerer på konkursens rand (Greenland Oil Spill Response akiliisinnaajunnaaqqajaavoq)” ilanngutassiaraa

Akiliisinnaajunnaarneq tassaavoq inuup akiliisinnaajunnaartup pigisaannik akiitsuinillu eqqartuussivimmi suliarinninneq. Akiliisinnaajunnaartoq, akiliisinnaajunnaarluni sulianik unitsitsinermut atatillugu isumaqarpoq, akiitsunut akilersuutit akiligassanngortarneri malillugit akilerneqarsinnaajunnaartut.

Greenland Oil Spill Response ingerlalluartumik akiliisinnaassuseqarpoq aammalu akiligassaqarfimminik akiliinissamik ajornartorsiuteqarani. Ingerlatseqatigiiffik aamma taarsigassarsisimanngisaannarpoq.

§ 37 naapertorlugu apeqquteqaammi ingerlatseqatigiiffiup akiitsui, akiliisinnaassuseqarnera aamma siunissami periarfissaasut apeqquteqarfigineqarput. Pissusiviusut tassaapput uuliasiorfiutileqatigiiffiit maannakkorpiaq aningaasaleerusussuseqarpallaanngitsut aammalu Kalaallit Nunaata kitaata sineriaata avataani kisermaassisussaatitaallutik akuersissutit arlallit utertinneqarnissaat ilimasaarutigineqarluni. taamaattumik Greenland Oil Spill Response-mi pisortat 2016-ip aallartinneranili ingerlatseqatigiiffiup siunissaa qanoq isikkoqassanersoq pillugu Namminersorlutik Oqartussat oqaloqatigilerpaat.

Ingerlatseqatigiiffimmi allanngortoqanngippat, 2018-ip aallartinnerani aningaasat karsimiittut nungussasut, eqqorpoq. Taamatut oqareerluni, ingerlatseqatigiiffik taamaattoq atortunut 20 millioner koruuninik nammineq aningaasaateqarpoq aammalu akiitsoqarani. Taamaattumik Greenland Oil Spill Response akiliisinnaajunnaaqqajaalluni inissisimasoq oqassalluni toqqaannartumik eqqunngilaq.

Greenland Oil Spill Respones maannakkorpiaq ingerlatseqatigiiffiup siunissami periarfissai pillugit Namminersorlutik Oqartussat qanimut oqaloqatigalugit suliaqarpoq, aammalu ingerlatseqatigiiffik aamma Kalaallit Nunaat aqqutissarsitinneqassasut annertoorujussuarmik naatsorsuutigalugu. Tassami Greenland Oil Spill Response uuliamik mingutsitsinermut atortunik annertoorujussuarnik pigisaqarpoq kiisalu nammineq kajumissutsiminnik uuliakoornernik akiuiniartartunik ilinniakkaminnik naammassereersimasunik arlalinnik, uuliamik mingutsitsinermik anginerusumik pilersoqalissagaluarpat Kalaallit Nunaanni avatangiisinut annertoorujussuarmik iluaqutaasinnaasunik, sulisoqarluni.

Peqatigisaanik oqaatigineqassaaq nunarsuarmi avatangiisunit Greenland Oil Spill Response-p siunissaa upperineqarmat; ingerlatseqatigiiffik EU-mi aningaasalersorneqartumik avatangiisinut suliniummi, ukiut marluk tulliuttut ingerlaneranni ingerlanneqartussami peqataavoq aammalu uuliasiornermik suliaqartut sinneruttut 2015-imi atortunut nutaanut kiisalu uuliakoornermik akiuiniartartunik nutaanik ilinniartitaanermut aningaasaliinissaq toqqarpaat.

2015-imut ukiumoortumik naatsorsuutit takuniaraanni, takuuk: http://www.gosr.gl/rsrapporter1

§ 37 naapertorlugu apeqquteqaat akissutaalu takuniaraanni, takuuk: http://www.inatsisartut.gl/inatsisartuthome/paragraf36.aspx