Pisortaq nutaaq

Maartsi, 2013


Greenland Oil Spill Response-p, ingerlatseqatigiiffiup Namminersorlutik Oqartussanit pilersinneqartup, Nuummi Kalaallit Nunaanni inissisimaffeqartup, ulloq 15. marts 2013 aallarnerfigalugu pisortassani atorfinitsippaa

2012-imi aasaanerani Namminersorlutik Oqartussat aalajangerput ingerlatseqatigiiffik Greenland Oil Spill Response ingerlatseqatigiiffittut 100%-imik Namminersorlutik Oqartussanit pigineqartutut pilersinneqassasoq. Ingerlatseqatigiiffimmik pilersitsinermi siunertaavoq Kalaallit Nunaanni aatsitassanut suliassaqarfiup iluani uuliasiorluni misissuinermut upalungaarsimanermut, uuliakoornermi mingutsitsinermik akiuiniarnermut, uuliakoornermi mingutsitsinerup tassungalu assigusumik suliaqarnerup kingorna avatangiisini saliinissamut tunngatillugu suliaqarnermik ingerlatsinissaq.

Ungasissoq isigalugu siunertaavoq ingerlatseqatigiiffiup nunani tamalaani maleruagassat malillugit uuliakoornissamut upalungaarsimanermut ingerlatseqatigiiffittut suliaqarluartussatut ineriartortinneqarnissaa.

Pisortatut atorfimmik isumaginnittussatut Lonnie Bogø Wilms 33-inik ukioqartoq atorfinitsinneqarpoq, taannalu Nuummi Aatsitassanut Ikummatissanullu Aqutsisoqarfimmi Head of Section-itut atorfimmeersuuvoq. Lonnie cand. Negot-itut ilinniagaqarsimasuuvoq aammalu Aatsitassanut Ikummatissanullu Aqutsisoqarfimmi siusinnerusukkut atorfigisimasamini assigiinngitsorpassuarnik akisussaaffeqarfinnik isumaginnittuusimavoq, ilaatigut uuliasiorfiutileqatigiiffinnit Kalaallit Nunaanni pisinnaatitsissuteqartunit uuliakoornissamut upalungaarsimanermik nalilersuinermut akisussaasuusimalluni.

Upalungaarsimanerup aamma HSE-p iluanni ilinniartitaanerit pikkorissarnerillu assigiinngitsut naammassisimavai, taamatullu Greenland Oil Spill Response-p pilersinneqarnerani qanimut akuusimalluni.



Siulersuisut pisortartaaq isumalluarfigisorujussuuaat, qularinngilluinnarlugu
lu suliassat piginnittut taamatullu sullitat tamakkiisumik naammagisimaagaannik naammassineqartarumaartut, aammalu Lonnie Bogø Wilms Greenland Oil Spill Response-p nunani tamalaani niuerfimmi eqeersimaartumik suleqataanissaanut ineriartortitsisinnaalluartoq.

Siulersuisuni ilaasortaapput
Steen O. Hansen, Danbor (siulittaasoq),
Oddbjørg Greiner, NOFO
kiisalu Hanne Berthels, Air Greenland.

Annertunerusumik paasisaqarusunnermi attaveqarfigineqarsinnaavoq siulittaasoq Steen O.Hansen oqarasuaammut angallattakkamut +45 40297640