Greenland Oil Spill Response Nuummi uuliakoornermik akiuiniartussanik ilinniartittilluni ingerlatsivoq. Ilinniartitsineq oktoberimi 2016-mi aallartinneqassaaq. Taamaammat uuliakoorneq pillugu ilikkagaqarusuppit, avatangiisinut suliniuteqarusullutit aammalu suliffitsinni suleqataarusullutit, taava una takuuk:

Neqeroorutigaavut:

  • Uuliakoornermik akiuiniarnermi atuartitsineq, tassa imaappoq;

    • Uuliakoornerup pissusilersortarnera sunniuteqartarneralu

    • Avatangiisinut sunniisarnera

    • Upalungaarsimanissamik pilersaarusiorneq aamma passussisarneq

    • Uuliakoornermik nalilersuineq

    • Suliaqarnissamut pilersaarusiorneq

    • Uuliakoornissamut upalungaarsimanermut atatillugu sulinermi avatangiisit aamma inuit isumannaatsuunissat

    • Periusissanut iliuusissaq

    • Eqqagassalerineq, nuussisarneq, toqqorsivimmiititsineq aamma tunisisarneq

    • Upalungaarsimasunik aallartitsineq, unitsitsineq aamma apersuineq

       

  • Uuliakoornermik akiuiniarnermut atortut pigisatta atornissaannut ilinniartitsineq, ilanngullugit;

    • Maskiinat atorlugit katersuissutinik atuineq (katersuissutit)

    • Assiaqusersuutinik puttasunik ikkussuineq

    • Sissamik saliineq aamma atortunik paarsineq

       

  • Sulinermi akissarsiassanik annaasaqarnermut taarsiissutit

    • Pilersaarutaasumik atuartitsinermi sungiusarnermilu nalunaaquttap akunneranut 95kr

    • Pisoqavissornerani peqataanermut nalunaaquttap akunneranut 155kr

Illit:

  • 18-it sinnerlugit ukioqartuussaatit

  • Nalinginnaasumik pitsaasumik peqqissuseqassaatit

  • Tatiginartuussaatit

  • Ilikkagaqarnissamut piumassuseqassaatit

  • Suleqateqarnissamut piumassuseqartuussaatit

  • Sulinermi avatangiisinilu isumannaallisaaneq ataqqissavat

  • Atuartitsinerni pilersaarutaasuni peqataasinnaassaatit (quppernermi matumani allerpaani ullut atuartitsiviusussatut pilersaarutaasut takukkit)

 

Iluaqutaassaaq (kisianni piumasaqaataanani) makkuninnga misilittagaqaruit:

  • Imarsiornermi sulineq

  • Upalungaarsimanermi sulineq

  • Teknikkimik suliaqarneq

Atuartitsineq kalaallisut danskisullu ingerlanneqassaaq. Greenland Oil Spill Response-mi uuliakoornermik akiuiniartartutut ilinniarnerit naammassigukku, uagutsinni kajumissuseq malillugu uuliakoornermik akiuiniartartutut atuunnissamik soqutiginnissasutit naatsorsuutigaarput. Tassa imaappoq ukiumut minnerpaamik ulluni sisamani atuartitsinermi/sungiusaanermi (aningaasaqarnikkut taarsiivigineqarlutit) peqataasassaatit. Uuliakoornermik akiuiniarnermut ikiortissatut atorfissaqartilissagutsigit sapinngisamik sukkanerpaamik aggersinnaassaatit. ”Aggersarneqartussanut allattuiffimmi” allassimanermut aningaasaqarnikkut taarsiivigineqassanngilatit, kisianni soorunami uuliakoornermik akiuiniarnermi peqataanermut aningaasarsissaatit. Uagut soorunami atuartitsinermi, sungiusarnermi imaluunniit pisoqavinnerani peqataanerni sillimmasiissutit, nerisaqarneq, inuttut illersuutit atortut sullisillu inatsisitigut piumasaqaataasut isumagissavagut.

 

 

Greenland Oil Spill Response-mi uuliakoornermik akiuiniartussat sooq atussavagut?

Greenland Oil Spill Response Namminersorlutik Oqartussanit pigineqarpoq, kisianni uuliasiorfiutileqatigiiffinnit aatsitassarsiorfiutileqatigiiffinnillu Kalaallit Nunaanni imaani ingerlataqartunit aningaasalersorneqarluni. Uuliasiorfiuliteqatigiiffiit aatsitassarsiorfiutileqatigiiffiillu upalungaarsimanermut pilersaarutaannut piumasaqaataasut naammassiniarlugit, Namminersorlutik Oqartussat tungaanniit, upalungaarsimanermut suliffeqarfiit nunanit allaneersut kisimik atorneqarnissaannut taarsiullugu, najukkami upalungaarsimasunik, suliassamik taassuminnga isumaginnissinnaasunik pilersitsinissaq kissaatigineqarpoq. Uuliasiorfiutileqatigiiffiit aatsitassarsiorfiutileqatigiiffiillu Kalaallit Nunaanni ingerlataqarnerminni uuliakoornissamut upalungaarsimanermut pilersaarusiornissaq akisussaaffigaat, taannaavorlu uagut Greenland Oil Spill Response-mi uuliakoornermik akiuiniartussatut illit peqatigalutit ilaaffigisassarput.

Maannakkorpiaq uuliasiorluni qillerinissanik pilersaaruteqartoqanngimmat oqaatigissallugu pingaaruteqarpoq, kisianni ulloq taanna uuliasiorluni qillerisoqaqqilernissaanut sungiusarnissarput piareersimanissarpullu pingaaruteqarpoq. Taamaattoq suli imaani annikinnerusumik uuliasiorluni aatsitassarsiorlunilu misissuinernik suliaqartoqarpoq, aamma angallatinut taakkua ingerlataminni atugaannut uuliakoornissamut upalungaarsimanermut pilersaarutinik suliaqarnissamik peqquneqartunik.

Greenland Oil Spill Response-p nunami namminermi uuliakoornissamut upalungaarsimaneq isumagisussaanngilaa, tamanna Kalaallit Nunaanni maani qatserisartut aamma sakkutuut imarsiortut isumagisassaraat, kisianni uagut tamatuminnga piumaffigineqarutta nunami namminermi uuliakoornissamut upalungaarsimanermut ikiuussinnaavugut ikiuuttussaallutalu.

Nuummi Aasiannilu toqqorsivitsinni atortunik sunik peqarnersugut takusinnaavat uani http://www.gosr.gl/oliespildsberedskabsudstyr1 aammalu annertunerujussuarmik maani nittartakkatsinni uagut pilluta atuarsinnaallutit.

Tamanna soqutiginartilersimassagukku illit tusarfigerusuttorujussuuatsigit!